Il    dall'occurrenza

Gliendisgis sera, ils 3 da settember 2018 ...

... essan nus stai dus tozzels al program „da cuminonza“. Nus essan sesi en in rudi e risadas ha ei dau biaras. Dapli che 24! La sera ha teniu quei ch’il tetel veva empermess, numnadamein che „quei astgass vegnir legher“. Seras da MiSaPa (Mintgin Sa Participar) ein intec sco scarnuzs da surpresas. Ins sa buc tgi ed ins sa era buc tgei che vegn tut. Priu il plaid per divertir e far rir ils auters ha circa la mesadad dils presents.
Entschiet ha la sera cun sgnoccas sur da catschadurs. Els eran buca en nies rudi, mobein a catscha. Numerusas sgnoccas – cunzun da pli baul – ein lu stadas dedicadas a prers e plevons. Mo era quei che vegn ord la bucca dad affons ei stau bein representau, deletgeivel e magari schizun filosofic. La Marietta Cadruvi ei semussada sco in ver reservuar da sgnoccas e storgias. Cheu suandava in witz l’auter sco tier ils curals d’ina corda da paternos. La Fina Blumenthal, ch’ei stada scolasta e ch’era vegnida avon in temps cun l’idea da far ina sera hilarica inaga "da cuminonza", ha denter auter delectau la cumpignia cun zacontas sgnoccas da scolars. Ed igl Andreas Joos ha schizun survegniu in applaus spontan suenter ch’el ha giu cantau treis salmiras dil Tscheiver da Basilea, in eveniment buca mo hilaric, mobein, sco quei ch’el, ch’ha viviu zaconts onns a Basel ha declarau, in’occurrenza da gronda cultura e tradiziun che muossa ch’il humor ei in ventil, ina consolaziun, ina medischina e cunzun era in act creativ. 
Suenter 80 minutas han tuts saviu constatar che rir, era da cumpignia, fa bein. Igl ei in remiedi che spargna patgific in’ura da fitness ni da gimnastica. El beinvegni allas 20.15 han ils organisaturs fatg endamen che rir metta en funcziun 135 musclas, aulza il puls sin 120, animescha la respiraziun e stenda las alas dil lom, aschia ch’ellas san absorbar treis tochen quater gadas dapli oxigen. Leutier vegn la musculatura provedida meglier cun saung. Suenter il rir croda la pressiun plaunsiu, hormons da stress vegnan reduci ed il sistem d'immunitad vegn enfirmius. "Da cuminonza" ei pia bien schizun per la sanadad.

Il rapport en la Quotidiana dils 6 da settember saveis vus leger cheu!