Sonda, ils 3 da november 2018 ...
... ein biebein 60 persunas vegnidas per udir tgei che puras e purs da Ruschein relatan sur dil puresser d’ozilgi. Abstrahau dil tema dalla sera eis ei era stau ina sentupada denter differentas generaziuns e quei ton neu dils hosps envidai sco era neu dil publicum ch’ei vegnius per tedlar. Il program ufficial cuoza per ordinari ca. 75 minutas. Mo ils quater hosps vessen giu da raquintar aunc gitg e bia dapli, cunzun quels dus ch’han gia gronda experientscha cun far il pur. Franz Coray (56 onns) ha punctuau ch’el gaudi - sper il contact cun ses animals - cunzun la gronda libertad ch’el hagi, la libertad da saver decider sez mintga gi danovamein cura ch’el vegli far tgei, senza ch’in patrun camondi. Ursula Beeli (35 onns) appreziescha cunzun l’enorma diversitad dalla veta da pura el decuors dallas differentas stagiuns, seigi quei il contact culs animals, il svilup dalla natira, ni las differentas raccoltas. Rilana Cadruvi (18 onns) gauda era cunzun il contact cun vaccas e nuorsas. Ella veva fuffergnau avon che ir al Plantahof tier in veterinari e veva giu l’impressiun ch’ei detti leu quasi “mo” tgauns e gats. Il contact culs animals ei era zatgei dil pli impurtont per Fabrizio Cajochen (18 onns). Las maschinas agricolas interesseschan secapescha era el, mo el seigi plitost in manischunz plaun e precaut.
Las duas persunas giuvnas, Rilana e Fabrizio, han raquintau dalla scola al Plantahof ch’ellas frequentan ussa il tierz onn e da lur practicums. Fabrizio che fa actualmein in practicum en la Foppa ha envesta en ina stalla moderna nua che fetg bia ei automatisau. Sulettamein per giudicar cumpleinamein la qualitad dil latg hagi “il roboter da mulscher” buca sensurs avunda aunc. Rilana ha raquintau dad in eveniment che “s’auda halt era tier la veta purila dad ozilgi”. En in da ses practicums era ella sin in menaschi da muntogna cun varga 200 nuorsas. Ils tschuts pigns vevan problems cun ils egls che larmavan ed ella ha lavau o ils egls ad els cun te. Mo per finir seigien ils tschuts malgrad tut vegni endurmentai. Pil mument eis ella en plazza sin in menaschi da vaccas da latg en Glaruna ed ha da levar la damaun avon las tschun per far sia lavur.
Per Franz s’audan las naschientschas dils vadials tier ils gronds deletgs da siu puresser. Ed el ei ventireivels ch’el vegn per ordinari da tractar cun success vadials ch’han malcostas ni la fuera cun globulis homeopatics. Observar ils vadials nievnaschi che fan lur emprems pass per scuvier il mund e miran sin quel cun egls gronds – quels muments s’auda era per Ursula tier ils gronds deletgs dil puresser.
Era stgellas e scalins, ils differents caracters da vaccas brinas ni limousin, l’iniziativa per las cornas, la birocrazia ed administraziun carschenta, la stad cun pauca plievgia, “la via dil latg” e “la via dalla carn”, sco era l’intelligenza d’ina vacca tschocca han dau da discuorer. Igl ei stau ina sera varionta sco la veta purila sezza – cun in publicum interessau e cun hosps aviarts ed autentics.
