Il    dall'occurrenza ...

... e la prevista en La Quotidiana dils 27 da fevrer 2020:

Margis, ils 3 da mars 2020 ...

… ein varga 40 persunas stadas alla sera "da cuminonza" cun Cornelia Vinzens (*1985), scenografa ed architecta d'interiurs e cun Andri Arpagaus (*1991), accumpignader en in luvratori dall'Argo. Els han omisdus bandunau avon zacons onns lur "zona da confort professiunala", han reduciu lur temps da lavur ed ein sedecidi per ina scolaziun supplementara en ina domena creativa. Cornelia ha fatg ina scola da fotografar da dus onns a Barcelona ch'ella ha terminau igl atun vargau. Andri ha entschiet in studi al WIAM (Winterthurer Institut für aktuelle Musik) ch'el finescha proximamein cun il Bachelor of Arts in Music. 

All'entschatta dalla sera han els presentau mintgin circa in tozzel fotografias ed in video. Andri veva fatg dacuort in filmet che muossa co musica sesviluppescha tut spontanamein duront ina pausa en in zuler da sia scola. Ina gruppa da treis quater dels entscheiva, el sco bass-ghitarist, e tgi che vegn neutier sa separticipar tenor gust. Las fotografias ch'el veva tscharniu han documentau il mund da sia musica: ses instruments, il local d'emprova, il batten dil disc cumpact "Chapters of Life", impressiuns da concerts. Ed el, ch'ha sunau agl Open Air Lumnezia gia avon plirs mellis aspectaturs ha manegiau che in bien concert dependi bia dapli dall'atmosfera che regi che dad in grond publicum. Il video da Cornelia, bein tagliaus en in viv ritmus, ha tradiu co ella e siu partenari van in gi cun lur auto-rulotta pintga o dil marcau viers la mar. En sias fotografias ha ella mussau situaziuns particularas ch'ella ha passentau cun persunas ch'ein caras e preziusas per ella e s'audan el vast senn tier sia famiglia. Pervia dall'amur stat Cornelia a Barcelona, per la lavur eis ella adina puspei a Basilea e per guder la savur da sia derivonza eis ella meinsvart a Ruschein. Ella ha raquintau co quei funcziunescha per ella cun il spazi da coworking a Barcelona. Ella ha explicau tgei ch'ella fa veramein sco scenografa, ussa p.ex. concernent il WellnessHostel3000 a Laax, ella ha schau reviver zacontas regurdientschas en connex cun siu cudisch "Nus savevan da nuot auter - Etwas anderes kannten wir nicht" e Cornelia ha tradiu ch'ella maridi uonn siu partenari ch'ei oriunds dil Chile. Andri ha raquintau che el, sco student da musica, seigi leds da saver habitar aunc a casa tier ses geniturs a Ladir. Il gliendisgis sera ha el mintgamai emprova cun la band NoFuture a Glion. Dus gis ad jamna eis el a Winterthur e treis gis ad jamna lavura el sco survigilader ed accumpignader tier l'Argo a Cuera. L'Argo ei ina fundaziun che rinforza ed integrescha en il mund dalla lavur persunas cun in impediment. Quei ei ina purschida che fa veramein senn tenor Andri, mo che pretenda era dabia pazienzia. El veva priu differents objects cun el alla sera "da cuminonza" vid ils quals sia squadra da strusch 20 persunas ed autras squadras lavuran, denter quels objects era in spellitschader che l'Argo metta ensemen e pachetescha duront uras ed uras da lavur a maun.