Il    dall'occurrenza ...

... e la prevista en La Quotidiana dils 30 dad uost 2023:

Dumengia, ils 3 da settember 2023 ...

... eran exact 45 persunas seradunadas en la stanza 11 dalla casa da scola Crestas, cumpriu il hosp dalla sera Patrick Capaul. Dapi 24 onns lavura el tier RTR Radiotelevisiun Svizra Rumantscha. Gl'emprem ha el fatg leu da quei da 10 onns radio, cunzun "battaporta", e lu ha el midau tier la televisun. Per la sera "da cuminonza" veva el proponiu da mirar ensemen tschun schatgs or da films ch'el ha fatg: treis ord "Cuntrasts" dil davos temps e duas contribuziuns dil "Telesguard". El ha raquintau en sia spontanadad, sinceradad e coolness che il bi vi da sia lavur seigi ch'el sappi adina puspei seconfruntar - enten realisar in film - cun temas ch'interesseschien el. Mo el ha ├Ę sincerau che enqualga seigi sia lavur stentusa sch'el hagi da far ina contribuziun tier in tema che interesseschi insumma buca el. Patrick ei buc "mo redactur" tier la televisiun, dapi in temps filmescha el savens era sez sias contribuziuns. Quei seigi buca adina mo cumadeivel, cunquei ch'ei seigi - tier la lavur da redactur - era da purtar entuorn sez igl entir equipament e mirar che tut la tecnica seigi en uorden, mo quella sfida fetschi era plascher ad el e detti gronda cuntentientscha. In da ses "Cuntrasts" ch'ei vegnius tematisaus a "la sera dils treis" ei il film "Svanida", in film che va sut la pial. Quei film raquenta tgei che quei munta, cunzun per ils confamiliars, sche ina persuna svanescha tuttenina, fa pli probabel suicid mo lai anavos negins clars indezis leutier. Sin quei film hagi el giu immens bia resuns, era da persunas buc romontschas.

Sin il placat per la sera cun Patrick veva Andreas Joos nudau: in um dalla televisiun, in um dalla musica e lu aunc in da Ruschein. A Ruschein ei Patrick carschius si, mo el ei buca savens pli en siu vitg nativ. El levi gia dagitg mussar a sia amitga la ruina dil casti sin Plontabuora - mo ils davos siat/otg onns seigi quei buca sedau aunc. E tuttina svegli quei en el sentiments da "jeu sun da leu", sch'el audi, vesi ni legi zatgei da Ruschein.

La musica gioga per el aunc adina ina gronda rolla. La mesjamna sera vegni el ensemen regularmein cun treis collegas e lu fetschien els per els lur "Dienstags-Jam". Quei seigi "arver ils ventils", emblidar ils quitaus e semplamein "esser el flow" enten far musica. En sia carriera sco "ghitarrist sin tribuna" ha el sunau varga 500 concerts, en Svizra ed egl exteriur, da quei bien 100 cun la band da rock "Nau" ch'ei vegnida sligiada igl onn 2018. Quella ha ediu duas CD's, dall'emprema hagien els vendiu entuorn 1500 CDs, dalla davosa - "acca bacca" - bien 500.

Sin la damonda a Patrick, ch'ei naschius igl onn 1972, tgei che seigi impurtont per el oz, cumparegliau cun pli baul, ha el manegiau: "Jeu stoi buc provocar ed irritar pli sco da giuvenot ed jeu pondereschel oz meglier avon che permalar zatgi. Jeu vai buc breigias pli dad esser in flot." Ch'el ei "in flot" el meglier senn dil plaid ha il publicum dalla sera confirmau cun in liung applaus e cun star suenter aunc in'uriala da cumpignia cun in migiel aua ni vin enta maun - offeriu da siu padrin Marcus Menzli e da Flurina Menzli.
                                                                                                                                Maria Cadruvi