Tgei occurrenzas?

Per ordinari steva in tema el center, p.ex. aura, pumpiers, mort, bialas canzuns, fugitivs,
recepts da cuschina, tgira e salvament, fotografias veglias, humor etc. etc.
Tier certs temas ein „hosps“ stai envidai che han informau e raquintau da lur lavur,
da lur experientschas, da lur veta.
Tier auters temas ha „in e scadina“ saviu prender part activamein. Quei era las seras
da MiSaPa (mintgin sa participar) nua bein enqual persuna ha divertiu e commuentau
cun raquintar da plaschers e quitaus, da patratgs ed eveniments en connex cun il tema dalla sera.

Ei mava adina per sentupar, tedlar, communicar, selegrar e discussiunar.
L'entrada a nossas occurrenzas ei adina stada gratuita.

Per tgi?

Per tgi che vuleva - giuven e vegl, umens e dunnas da Ruschein e Ladir.
Era persunas d'ordeifer e hosps ein adina stai cordialmein envidai e beinvegni!
„da cuminonza“ ha vuliu promover il contact denter las generaziuns, pia era
schar vegnir a plaid la giuventetgna ch’ha savens interessantas occupaziuns
e professiuns, dallas qualas ins sa pauc el vitg.
Las sentupadas ein vegnidas fatgas per ordinari per romontsch
ed ina ga ni l’autra era per tudestg, cunzun sche in hosp envidau discurreva buca romontsch.
Persunas che capevan romontsch, mo discurrevan buca quei lungatg,
han secapescha era saviu far lur votums per tudestg.