Das 
zur Veranstaltung ...
... e la prevista en La Quotidiana dils 30 d'october 2025 -
ed in omagi dad Andreas Cadonau en La Quotidiana dils 3 da november 2025:
Gliendisgis, ils 3 da november 2025 ...
... ein aschi biaras persunas sco aunc mai seradunadas per star "da cuminonza" - da quei dad 80 en tut. Il placat dalla 50avla e davosa sera veva annunziau in "punct final cun tuns e maletgs".
La revista cun varga 20 contribuziuns da video ed audio (per gronda part scursanidas), ord igl archiv da RTR, ha delectau il publicum e pliras persunas han manegiau: "Jeu vess aunc gitg mirau ...". Mo sco per ordinari ha il program cuzzau "mo" 75 minutas e duront quellas ha ei dau bein enqual risada e surstada el publicum che seseva sco en in kino.
La fiasta d'avon 20 onns per la vice-canceliera e pli tard canceliera federala Corina Casanova, las reflexiuns da Georges Darms en connex cun "humor" ni "tradiziuns", ils commentaris da Wendelin Cajochen duront ch'el fa schuber en las vias da Cuera - tut quei ha il publicum mirau e tedlau bugen. Impressiunau ha era la historia dall'orgla nova en baselgia, las reflexiuns da scolast Luzi e scolast Giacun en connex cun far oraziun ni la historia d'amur dad Olivia e Toni-Cola-Cadruvi.
Co il temps varga e co era ils pigns vegnan gronds, da quei ein ils aspectaturs e las aspectaturas vegni cunscients tier igl usit da Pastgas d'avon 40 onns ni tier la viseta che affons da Ruschein han astgau far agl uestg en siu casti episcopal. En "atgna caussa" han Maria Cadruvi ed Andreas Joos mussau ina contribuziun, fatga dad RTR en connex cun lur casa, ch'ha survegniu igl onn 2010 dus premis solars.
Cun in grond e liung applaus ha il publicum exprimiu sia renconuschientscha per las 50 seras "da cuminonza a Ruschein - la sera dils treis". La gruppa d'interess hagi daveras enrihiu ed enfirmiu il spért da cuminonza cun quellas occurrenzas ch'han giu liug regularmein, circa sis gadas ad onn, dapi igl avrel 2016.
La gruppa d'interess:
Andreas Joos, Maria Cadruvi, Carin Blumenthal-Coray, Mengia Menzli, Norbert Coray (da seniester)
Suenter il program "ufficial" ha la sera cuzzau aunc gitg. Marie Pohlodek ed Ingo Sporner, che passentan ina gronda part dil temps en lur casa a Ladir, han offeriu in apéro riche che Dieter Wittmann da La Terrassa a Ladir ha preparau e presentau el foyer dalla casa da scola.
Igl ei semussau che era quei ei "cuminonza": dar ina paterlada cun quella e cun tschel, cuort ni pli liung, cun in migiel aua ni vin enta maun, schar reviver regurdientschas da temps vargai e far plans per igl avegnir - forsa schizun cun reflectar e ponderar tgei ch'ins savess aunc tut far egl avegnir per contribuir ad ina buna atmosfera el vitg, en in spért dad amicabladad, respect ed interess in per l'auter. La collascha dils 50 placats ha en mintga cass mussau, tgei ch'ei tut pusseivel.
