Dumengia, ils 3 da november 2024 ...
... ein varga 40 persunas vegnidas a "da cuminonza" per tedlar tgei che "la Romontscha dalla Bassa" e sociolinguista Renata Coray raquenta. Entschiet ha la sera cun ina seria da fotografias che ella ha commentau cun humor e cun informaziuns ch'han interessau fetg il publicum: fotografias da famiglia e parentella, dalla casa paterna da siu bab a Ruschein, dalla casa nova da famiglia a Tecknau BL (nua che Renata ei carschida si en ina gronda famiglia) e cunzun - fotografias da sia atgna casa a Ruschein ch'ella ha saviu cumprar avon siat onns.
Siu um, Peter Stricker (in Turitges ch'era gia avon meinsvart a Ruschein perquei ch'el veva cheu in collega), hagi atgnamein enderschiu che ina casa a Ruschein seigi venala - la casa dalla Posta Veglia. "Sche jeu vess giu da malegiar d'affon ina casa che plascheva a mi, sche lu vess jeu malegiau ina exact sco quella", ha Renata tradiu. E cun egls glischonts ha ella raquintau ch'ella seigi enorm engrazieivla che ella hagi saviu cumprar quella casa "per in prezi favoreivel" e - in interessant detagl - che ina sora da sia tatta da Ruschein hagi viviu en quella casa. En la seria da fotografias ei è in velo staus da veser, siu mied per vegnir vinavon el marcau da Turitg e da Friburg. A Turitg ha ella ina pintga habitaziun ensemen cun siu um ed a Friburg ha ella siu biro e sco "pied-à-terre" in pign studio per star sur notg.
Sin la damonda tgeinins treis adjectivs ch'ella duvrassi per tipisar sesezza, ha ella manegiau:
cunscienziusa, interessada e sportiva. Ella ha fatg cun ina amitga il Gran-Prix da Berna, ina cuorsa da cuorer da 16 km, ella va adina puspei a senudar en la Limmat (era sche quella ha ina temperatura da mo 14 grads) ed ella fa bugen ensemen cun siu um liungas spassegiadas e turas en las muntognas. Interessada eis ella per biaras caussas, mo cunzun per la sociolinguistica. Ed ella ha declarau che quella sparta dil lungatg hagi buca da far cun la grammatica ni cun la derivonza dils plaids, mobein cun la damonda co ina societad, ina cuminonza, drovi il lungatg per (se)communicar. Ella sezza meina projects sociolinguistics agl Institut per plurilinguitad che fa part dall'Universitad da Friburg. In project ch'ha interessau ed occupau ella fetg ei vegnius realisaus en connex cun la pandemia da Covid 19. La damonda era: Co ei vegniu communicau per informar la populaziun. Ed en tgei lungatgs han ins translatau tgei informaziuns per proteger tut la glieud en Svizra e buca mo persunas che capeschan in dils quater lungatgs naziunals.
Perdetga dad ella sco persuna cunscienziusa dat era sia lavur da dissertaziun "Von der Mumma Romontscha zum Retortenbaby Rumantsch Grischun", ina lavur da varga tschun onns, cumparida en in gries cudisch igl onn 2008. Realisar quella lavur hagi duvrau bia perseveronza. Mo ei eri clar per ella da tener la dira e finir quella lavur. Intec pial dira hagi ella duvrau en connex cun las reacziuns sin sia lavur, reacziuns cuntraversas. Sin la damonda tgi che getgi ussa "Frau Dokter" ad ella, ha ella stuiu rir ed ha manegiau: "Il pli bugen negin".
Maria Cadruvi
