Il     dall'occurrenza ...

 

Mesjamna, ils 3 d'avrel 2024 ...

... ha il tema "uaul" cun ils dus selviculturs Sigi Andreoli e Remo Alig carmalau varga 40 persunas a "da cuminonza", denter quellas era zacontas si da Glion, giu da Ladir e neu da Rueun. Igl ei stau dad udir e sentir che la professiun da selvicultur ei ina che dat bia plascher e gronda satisfacziun als dus selviculturs da revier dalla vischnaunca da Ilanz/Glion.

Sigi Andreoli (*1962) da Cuera che stat dapi 36 onns a Ladir sa mirar anavos sin ina liunga carriera d'uaul. Bia ei semidau ils davos decennis, ha el saviu da raquintar: il cunfin d'uaul ei sesalzaus marcantamein, ils fraissens piteschan ozilgi era tier nus e l'administraziun en in menaschi forestal ei carschida enorm.

Per Remo Alig (*1992) da Ruschein ei igl emprendissadi da bostger e silsuenter la scolaziun alla Scola specialisada superiura sco selvicultur a Maiavilla stada pér la tiarza schelta professiunala. Avon ha el giu fatg igl emprendissadi da lennari e da miradur. Mo el ha sincerau cun egls tarlischonts che el hagi ussa propi cattau sia lavur da siemi. Cunzun igl esser giuado, ella natira multifara, egl uaul cun tut sias funcziuns, ei per el da gronda muntada. Ed observar e cultivar la selva (sco selvi-cultur) ei per el era ina occupaziun che fa senn.

Ils dus umens dil fatg han saviu captivar il publicum cun lur savida e lur experientschas quei che pertucca las quater funcziuns impurtontas digl uaul:
- proteger glieud, animals, habitadis ed infrastructura da prighels dalla natira
- mantener il spazi da viver da biaras differentas specias da plontas ed animals
- furnir lenna sco materia prima per baghegiar ni scaldar
- esser liug da recreaziun e temps liber

Els han era saviu explicar fetg bein che ils interess per igl uaul divergeschan - tut tenor cun tgei egls ch'ins mira sin ina situaziun concreta. Remo Alig, ch'ei buca mo selvicultur mobein era catschadur, ha illustrau quei cun igl exempel dil luf. Sco selvicultur sappi el constatar ch'il luf seigi fetg buns per la sanadad digl uaul - mo sco catschadur hagi el secapescha aunc in'autra vesta ... Sigi Andreoli ha raquintau dad uauls "schubers" e sco stergliai, senza in rom giun plaun, uauls che seigien forsa "bials" els egls da biars turists ... Mo el e siu collega han suttastrihau che per la biodiversitad e per il prosperar dalla selva seigi empau "dischuorden" egl uaul bia meglier. Tgei che omisdus han mess a cor al publicum zun allert ed interessau ei stau: Mei cun respect egl uaul - e secapescha cun egls aviarts. Ei dat aschi bia da veser, surstar e guder.