Margis, ils 3 da settember 2024 ...
... ein bunamein 50 persunas seradunadas en la stanza da scola 11. Il tema dalla sera veva carmalau neutier buca mo beinenqual cantadura ni cantadur dil chor mischedau Ruschein, mobein era zacontas persunas d'ordeifer che diregian ni che han dirigiu auters chors. Cantau ei buca vegniu quella sera. Mo sin la damonda: "Tgei cantasses il pli bugen gest ussa, sche Vus savesses giavischar ina da Vossas canzuns preferidas ord il repertorie dil chor mischedau?" han dus dils hosps dalla sera menziunau La flur alpina ("Sch'aunc tontas flurs il matg purschess ...").
Dus da quels hosps - Ewald Vinzens ed Ursula Capaul-Mirer - seregordan aunc bein co quei ei stau cun la fundaziun dil chor mischedau Ruschein igl onn 1979, pia avon 45 onns. Il chor viril veva semplamein memia paucs cantadurs da gliez temps ed ina fusiun cun il chor viril da Ladir vegneva gnanc en damonda per certins ... Ewald ch'ei staus il davos president dil chor viril ed igl emprem president dil chor mischedau ha saviu da raquintar bein enqual anecdota en connex cun chors e dirigents. E per Ursula, che cantava bugen gia d'affon e pli tard el seminari da scolastas e scolasts a Cuera, era ei clar naven dall'entschatta, ch'ella vegli far part dil chor mischedau. Ella ch'ei aunc adina cantadura ha denteren era dirigiu il chor mischedau Ruschein e segida aunc adina cura ch'ei va per far ils registers.
Cuort avon "Corona" ha Patricia Cadruvi surpriu la bitgetta dil chor mischedau Ruschein. Ella ha punctuau che ella seigi dirigenta - mo buca dictatura. Las decisiuns ch'ella prendi en connex cun il chor, seigi quei puncto litteratura cantica ni program da concerts, tier quellas decisiuns vegli ella vegnir en entelgientscha cun cantaduras e cantadurs. Mo Patricia ha era tradiu ch'ei seigi buca adina sempel da cattar in consens, perquei che ils giavischs da cantaduras e cantadurs mondien fetg in ord l'auter. Ei seigi da far biars spagats. Ils ins mondien per la cumpignia en in chor - ils auters per tgirar la cultura cantica. Las inas veglian cantar canzuns romontschas - las autras era inaga zatgei per engles. Ils ins contien bugen en baselgia e da concerts - ils auters lessien schi pauc program sco pusseivel.
Il quart hosp dalla sera - Dante Cola - ei buca mo el chor mischedau Ruschein, mobein era el chor dalla claustra. El va a Mustér el gimnasi ed el ei schizun vida far ils cuors da direger chors da laics. Dante ha raquintau ch'el, cun ses 17 onns, sesenti bein el chor da Ruschein. El conta leu mintgaton era solo ed el accumpogna magari era il chor all'orgla sche quel conta ina messa en baselgia.
Sin la damonda: "Tgei giavischeis al chor per igl avegnir?" han tuts quater hosps - Ursula, Ewald, Patricia e Dante - rispundiu ch'els sperien ch'ei detti aunc gitg il chor mischedau Ruschein, ch'els hagien plascher sche lur contribuziun alla cultura e cuminonza dil vitg vegni era appreziada e che novas cantaduras e cantadurs seigien beinvegni el chor. Tgunsch pusseivel ch'ei ha dau ina ni l'autra annunzia duront igl apero cun aua ni vin.
