Il   dall'occurrenza!

Sonda sera, ils 3 da settember 2016 ...

... suenter nossa pausa da stad e malgrad l’entschatta dalla catscha, ein da quei da 30 persunas vegnidas a „da cuminonza“.

   Albertina Klaiss ha commuentau nus cun raquintar da ses numerus viadis e da siu engaschi en Guatemala per UPLa (Unterstützungsprojekte für Lateinamerika). Ella ha raquintau dils fretgs delizius dalla tiara, mo era dalla paupradad che regia en biaras famiglias. Sin ina dallas 11 fotografias ch'ella ha mussau ei stau da veser il Centro Medico Klaiss a Choqui bajo en Guatemala, che porscha provediment medicinal e distribuziun da medicaments per in prezi mudest. E sin in'autra fotografia sesevan treis affons fetg da stretg en in pign baun da scola. Senza siu engaschi savessen els forsa gnanc ir a scola. La quota dad alfabetissem en Guatemala ei oz aunc fetg aulta. La dunna da 50 onns da Ruschein ha dil reminent sincerau: Mintga donaziun va 100% en favur dils projects dad UPLa. Cun auters plaids: Era ses proxims viadis en Guatemala vegn Albertina a pagar sezza.

   Mengia Menzli ha delectau ils presents cun raquintar da ses treis viadis a pei viers Santiago de Compostela. Siu emprem viadi da quei gener ha ella fatg igl onn 2011, cura ch’ella ei ida en pensiun. Per la sera "da cuminonza" ha ella tscherniu 10 fotografias, denter auter cun la signalisaziun dallas differentas rutas e las diversas qualitads da vias. In tema ei era stau la peisa ed il cuntegn dil saccados ed il vast spectrum da „dormitoris“ sin ses viadis. Ella ha durmiu en refugis per pelegrins, en claustras, schizun en in’anteriura perschun ed era en ina halla da gimnastica. Ed igl ei stau diverteivel dad udir co ella ha raquintau da cumpogns e cumpognas da viadi ch’ella ha entupau. Mintgin era cun in’autra motivaziun sin via. In dils intents dalla Mengia ei stau da vegnir en contact cun differenta glieud. „Co vegness jeu schiglioc ad emprender d’enconuscher in um giuven ch’ha duvrau in timeout suenter sia lavur alla buorsa da New York?“