Il   dall'occurrenza!

Gievgia sera, ils 3 da november 2016 ...

... ha ei dau ina sera per in e scadinA – quei vul dir: Tgi che vuleva ha saviu raquintar zatgei en connex cun il tema dalla sera „tgi ch’ha la veta ha la mort“. Dallas 25 persunas presentas han varga duas tiarzas priu il plaid ed ein separticipadas alla discussiun aviarta. Igl ei semussau che la mort ei tuttavia buca in tabu, silmeins buca en in vitg sco Ruschein. Ins senti el vitg che bunamein l’entira cuminonza prendi art e part sch’ei detti in mortori.
Lydia Coray, ch’ha fatg cuors per accumpignar moribunds, ha suttastrihau con impurtont ch’ei seigi stau per ella dad udir che agens problems hagien pers nuot sch’ins seigi tier ina persuna moribunda. Quella hagi in sensori nundetg fin en las uras dil cumiau definitiv. Marcus Menzli ha raquintau a moda profunda e tuttina lucca e cun humor co el ei sepreparaus per far in plaid da bara en baselgia per in da ses megliers amitgs. E Clara Cadruvi, mussadra da scoletta e catecheta, ha fatg impressiun cun raquintar co ella tematiseschi la mort cun ils affons, p.ex. sch’ei seigi gest in mortori el vitg: ella fetschi quei aviartamein e quasi „organicamein“ ed en ina moda adattada a quei ch’ils affons veglien saver.
Differentas persunas han schau reviver regurdientschas dall’affonza, cura ch’ellas han astgau (ni era buc) prender cumiau da persunas mortas – era cun tuccar en ils morts. Auters presents han raquintau da lur geniturs sin pugn da mort u dad atgnas anguoschas ni era dad ina gronda ruasseivladad sche la mort spluntassi ussa. Dau da discuorer ha era la moda co ch’ins vulessi murir in di e schebein ei seigi propi aschia ch’ins mieri sco quei ch’ins vivi ...
Ils usits en connex cun la mort ein stai in tema pliras gadas. Quei mument ch’ei tucca da miert el vitg ein biars commuentai. Ed ils dus babnos sin santeri – in per il defunct ed in per il proxim che suonda – fan impressiun, egal tgei ch’ins crei.
Malgrad la grevezia dil tema ha ei dau ina sera leva, viva, cun beinenqual rir da cor e levgiont.