Il    dall'occurrenza ...

... e la prevista en La Quotidiana dils 1 da november 2023:

Venderdis, ils 3 da november ...

... eran da quei da 50 persunas en la stanza 11 dalla casa da scola Crestas per tedlar tgei ch'ils protagonists dalla sera raquentan: las duas giuvnas ed ils dus giuvens ch'ein dapi sis onns or da scola ed han ussa 22 onns. En siu plaid da beinvegni ha Andreas Joos cuort schau reviver tgei che "marschava" cura che el veva 22 onns: igl onn 1967. Ils Beatles vevan ual publicau lur "Sgr. Pepper's Lonely Hearts Club Band". El Proxim Orient regeva l'Uiara da sis gis. Ed el e dus amitgs eran vida planisar in viadi en Sicilia ed in da quels amitgs veva cumprau in "Döschwo" per 250 francs.

Viagiar ei era stau in dils temas da Matia Coray, naschius il fevrer 2001. Suenter igl emprendissadi dad electroinstallatur leva el veser il mund. Mo el veva l'intenziun dad era "prestar e dar" zatgei sin ses viadis - e buca mo schar anavos siu rumien. Igl onn 2022, sin siu viadi el Nepal ha Matia aschia p.ex. gidau a reparar ina lingia d'aua. Ed el seigi ussa vida rimnar daners per in proxim project d'agid privat el Nepal - in project ch'el vuless realisar la primavera 2024.

Daria Cajochen, naschida il zercladur 2001, ha raquintau spontanamein ed aviartamein ch'ella seigi loscha dad haver dumignau, cun examen final e tut, igl emprendissadi da treis onns sco specialista da hotellaria. Pil mument lavura Daria en in pensum parzial sco vendidra en ina stizun. Avon onns inaga hagi ella getg a siu bab che in pur lessi ella mai. Ed ussa seigi ella ensemen propi cun in giuven che fetschi il pur - ed ella seigi savens gia la damaun allas sis en stalla e gidi.

Rino Casanova, naschius igl uost 2001, ha fatg igl emprendissadi da scrinari en ina fatschenta a Trun e lavura ussa sco scrinari en la fatschenta da siu bab. Il giuvenot ha tradiu ch'el seigi magari in "pedant" en sia lavur ed impundi mintgaton dapli temps che quei ch'ei fetschi da basegns per far las caussas exact. Sin ina dallas fotografias che Rino ha mussau ei stau da veser la tegia da cuolm dalla famiglia, in liug nua ch'el seigi fetg bugen. Mo aunc pli bugen sesa el para sin siu töf.

Noelia Caderas, naschida igl october 2001, ha saviu gia duront il temps da scola, suenter in fuffergnadi, ch'ella vegli vegnir coiffeusa. Suenter igl emprendissadi a Flem ha ella luvrau zacons meins giu la Bassa. Mo ella ei prest puspei turnada el Grischun perquei ch'ella scheva encrescher. Ils telefons cun sia mumma seigien mai stai aschi liungs sco da gliez temps. Oz ha Noelia siu agen salon da coiffeusa a Breil. E sper la lavur gauda ella da viandar en ses carezai cuolms.

Els discuors da Maria Cadruvi cun las duas giuvnas ed ils dus giuvens eis ei semussau con differents che ils quater hosps dalla sera ein - puncto lur occupaziun professiunala, lur interess e lur moda da s'exprimer - e quei malgrad ch'els ein naschi il medem onn, carschi si el medem vitg e stai en la medema scola primara. Ina biala manifestaziun dil fatg che "la veta ei aschi reha ed abundonta perquei ch'ils carstgauns ein aschi differents". Duront igl apero, suenter l'occurrenza, ha il publicum dalla sera pli probabel schau reviver bein enqual regurdientscha dil temps cura che els ed ellas vevan 22 onns.