Gievgia sera, ils 3 da matg 2018 ...
... ein varga 50 persunas vegnidas per tedlar co ei vesa ora davon e davos las culissas dalla lavur professiunala da Simona Giger e Stefan Cavegn. Els fan lavurs fetg differentas e tuttina eis ei semussau el decuors dils discuors cun els ch’els han bein enqual caussa da cuminonza. Els ein omisdus ambizius e promts da dar lur meglier en la clamada. Els han visiuns per lur avegnir professiunal, els ein aviarts e flexibels ed els enconuschan cun lur biebein 32 onns omisdus empau il mund, el senn ch’els ein viagiai bia sin differents continents. 
El focus da Simona Giger ein ils hosps. Per quels organisescha ella da tuttas sorts events, sinaquei ch’els hagien en lur vacanzas muments nunemblideivels, p.ex. cuschinar tratgas grischunas cun in anteriur cuschinier da num e pum sil Jakobshorn. Tier eveniments da sport ch’attrain mellis persunas, sco il gigatlon, ei Simona quella ch’ha massa fils entamaun e mantegn era saung freid e calma sche buca tut va sco planisau.
El focus da Stefan Cavegn ei la tecnica. El ei in specialist da mesiraziun da 3D e lavura vida metodas e process da mesirar ed evaluar quei ch’ins ha explorau sin distanza. El „scriva“ algoritmus e descriva quei sco lavur creativa ed intuitiva, ina lavur che pretenda precisiun ed exacta ponderaziun. Cun pliras folias ha Stefan illustrau las differentas etappas da sia via professiunala ch'ha entschiet cun la geomatica. Oz s'occupescha el dalla fotogrammetria, in tema global che meina baul ni tard p.ex. a vehichels senza manischunz.
Suenter il program „ufficial“ da ca. 80 minutas ein ils biars visitaders da „da cuminonza“ aunc stai in’uriala da cumpignia. Ils organisaturs han offeriu in bien sitg e las mummas da Simona e Stefan, Martha Giger e Valentina Cavegn vevan preparau in apéro riche da bellezia e buontad. Era quei ei ina part che l’entira cuminonza ha appreziau fetg.
