Il    dall'occurrenza

Venderdis sera, ils 3 da november 2017 ...

... ein varga 40 persunas vegnidas per tedlar tgei che pots e potas raquentan. Perfin dus „superiurs“ han vuliu vegnir – percass ch’ei „dessi plitost damondas strategicas“ – ed era els han para schau plascher la sera. Mo „la posta“ en general cun sia strategia d’interpresa ei insumma buca stada tema. Igl intent dalla sera era da mirar intec davos las culissas dalla lavur concreta da pots e potas dad ozildi – e da schar reviver reminiscenzas da pli baul. Sche la posta ei ina instituziun cun tgau, cor e mauns sche lu ein ils portabrevs quei ch’ins savess numnar ils mellis mauns da quella interpresa. La part dil cor ei sesminuida el decuors dils davos decennis, buca perquei che pots e potas havessen buca in bien cor, mobein perquei ch’igl urari da lavur e la quantificaziun dallas uras per mintga tura risguardan buca fetg il contact cun la glieud. Prender temps duront la tura per gidar in um vegl ad enfaschar las combas – gliez ei definitivamein zatgei da temps vargai. Claudio Truog ed Edith Cadruvi han accentuau ch'els deploreschien che lur temps da lavur lubeschi buca da discuorer dapli che dus treis plaids cun la glieud. Cunzun glieud pli veglia hagi magari breigias da capir quei. Mo pigl auter eis ei semussau ch’els fan aunc adina bugen lur lavur, era sch’igl ei da lavar baul ed d’entscheiver cun zavrar la posta la damaun gia entuorn las sis. 

Gion Darms ch’ei staus pot e postenent a Ruschein da 1978 entochen 1996 ha delectau igl auditori cun interessantas informaziuns da pli baul: la cravatta che s’udeva da gliez temps tier siu outfit quotidian, la sempla maschina da quintar ch’era da far ir cul maun dretg sch’ins leva ch’ella addeschi las summas, las scaffettas da brevs ch’ein vegnidas obligatorias cul temps e las varga 40 AHV’s ch’el pagava ô alla glieud en daner blut. Tut ils treis hosps dalla sera han cungiu l'occurrenza cun regurdientschas e reminiscenzas e dau mur e savur a "da cuminonza a Ruschein la sera dils treis". 

Cheu il rapport en La Quotidiana dils 7 da november 2017.