Il    dall'occurrenza ...

... e la prevista en La Quotidiana dils 29 d'avrel 2022.

Margis, ils 3 da matg 2022 ...

... en in ravugl quasi familiar ein 15 persunas seradunadas, las biaras cun in ni plirs objects per raquintar las historias da quels. Ei ha dau ina roscha bials muments narrativs - leghers, surprendents, commuentonts. Entschiet ha l'Irma cun in legn. Ella ha mussau in object che veva plaz en sia palma maun e dumandau "tgei ei quei?". In capodaster, in indrez movibel per scursanir la lunghezia vibronta dallas cordas d'ina ghitarra. Ella hagi entschiet a sunar quei instrument puspei - suenter biars onns - ed emprendi ussa da sunar era grazia a youtube. Saviu immediat co quei object hagi num ha la Marianne che suna era ghitarra. Ella sezza ei vegnida cun ina mini mini roda da vent. Cu ella hagi getg en siu contuorn ch'ella mondi ad habitar a Ruschein, hagi bein enqualin manegiau "ah, ti vas si leu nua ch'ei suffla adina". Per "trer a nez" il vent hagi ella montau sper siu parcadi a Ruschein ina roda da vent decorativa. Mo quella hagi ella buca vuliu demontar per la sera "da cuminonza". Perquei seigi ella vegnida cun in mini model dad ina tala roda. La Marietta ha purtau duas iconas ch'ella ha sezza colurau e raquintau dallas biaras bunas uras ch'ella hagi passentau cun quella occupaziun en differents cuors. Ed ella ha buca cuschentau ch'ella hagi era duvrau leutier dabiars bastunets ch'ins drova schiglioc per schubergiar las ureglias - per furschar naven la colur danvonz sin sias ovras d'art. La Mengia ha tradiu ch'ella hagi buca anflau il carnet ch'ella levi prender cun ella e perquei hagi ella cumprau in niev - in pign carnet da cassa. En quel vevi ella da nudar tut sias expensas cu ella mavi giu Glion ella secundara. Siu bab vevi mess a cor quei ad ella per ver ina survesta nua che ils dus francs daner da sac mondien. Inaga hagi ella scret el carnet "diversas - 20 raps". Siu bab hagi manegiau: "Diversas san ins buca cumprar, l'autra gada less jeu che quellas diversas hagien in num!" Quei seigi stau per ella ina scola e forsa in dils motivs pertgei ch'ella hagi saviu ir entuorn bein cun daners era en temps nua che quels erian tier ella pli scarts che ussa. La Fina ei vegnida cun la roda da filar da sia tatta da Medel ed ha raquintau pertgei ch'ella hagi fatg avon 45 onns cuors da filar e da teisser. Ella ha era priu launa cun ella e gest demonstrau co quei va da filar. Per haver entamaun la caussa stoppien ins ver filau silmeins 10 kg launa.

La Clara ha purtau ina pintga candeila ch'era aunc el pupi da cellofan e ch'ella ha lu gest pachetau ora cun menziunar che quella hagi ella survegniu avon 14 onns e teniu si sco regurdientscha. Avon 14 onns seigi ella stada per ina greva operaziun el spital a Turitg. Biaras persunas el vitg che savevien da quella operaziun hagien getg ch'ei envidien ina candeila per che tut mondi bein. Ella hagi fetg bugen candeilas ed il patratg che tontas hagien glischau per ella duront quell'operaziun, quei patratg fetschi bein ad ella aunc oz. Il Norbert ei vegnius cun in tarment buccal, in dalla cuppa Topolino, ina concurrenza da skis d'equipa per giuvenils ch'el hagi astgau coordinar ed accumpignar igl onn 2007 en l'Italia. Sia equipa vevi fatg il tierz rang ed ei hagi dau per quei buccal ina secunda veta a Ruschein. Duront biars onns buevien ils asens da Sontga Clau in sitg o da quel suenter ch'els erien stai tier ils affons.

Meinrad ha pachetau ora ina veglia scadiala da lenn glienda e raquintau che sia mumma vevi circa 12 da quellas - cuppas per la mesira da far paun. En quellas cuppas purziunavi ella la pasta per schar levar il paun casa. Andreas ei vegnius cun il tgau da Homer ed el ha schau reviver ina sera a Basilea, avon varga 50 onns. En in'ustria hagi el viu in um cun quella sculptura e suenter zacons quintins ed in hanletg spontan seigi el turnaus cun il tram a casa - "accumpignaus" dil poet grec. Tonta attenziun hagi el mai pli giu el tram. Il Pieder ha priu o da sac in cedel alv ch'el veva faldau. Quel pendi tier el en biro, ha el raquintau, ed el sco pur miri meinsvart sin quei cedel e legi lu magari ina duas strofas. Ei seigi ina poesia che fetschi adina puspei impressiun ad el, ha el sincerau e gest prelegiu ella: Il semnader dad Alfons Tuor.