Il    dall'occurrenza ...

... e la prevista en La Quotidiana dils 30 d'october 2019:

Dumengia, ils 3 da november 2019 …

… ein varga 40 persunas vegnidas a "da cuminonza". L'aua ei stada il tema, noss'aua da mintgagi che cuora ord la spina sco sche quei secapess da sesez. Il hosp dalla sera, Toni Cadalbert, caufontauna dalla vischnaunca da Ilanz/Glion ha informau sur dil provediment d'aua en la vischnaunca fusiunada. El ha punctuau che haver access ad aua schubra seigi in dretg human. E per che quei dretg vegni risguardaus dapertut, ton en habitadis pigns sco era en pli gronds, hagi la vischnaunca dad ademplir ina massa pensums, tonpli ch'il territori geografic dalla vischnaunca da Ilanz/Glion seigi vasts e la diversitad topografica e geologica multifara. L'aua che vegn tschaffada dalla vart seniastra dil Rein ei p.ex. plitost loma, l'aua dalla vart dretga pli caltschinusa e dira. Per garantir ina buna qualitad dall'aua prendan el e sia squadra denter 60 e 100 emprovas dad aua ad onn. Las cefras en connex cun il provediment d'aua fan insumma impressiun: 20 reservuars, 4 indrezs da turbinar aua per producir electricitad, 138 tschaffadas per spisgentar ils loghens habitai e 28 tschaffadas per las alps ed ils cuolms, 400 hidrants, 50 ventils per reducir la pressiun dall'aua e 198 km lingias dad aua. Sch'ina diala vegness en vischnaunca e savess realisar in grond siemi ni giavisch en connex cun l'aua, lura giavischass el che tut las lingias dad aua vegnessen messas en in bien stan, ha Toni manegiau. Per part ei quei lingias da varga 100 onns che stuessen vegnir remplazzadas, mo ei dat para era lingias da "mo" 50 onns ch'ein en in schliet stan perquei ch'ins ha duvrau in temps lingias ord material ch'ei buca secumprovaus alla liunga.

Numerusas ein era stadas las damondas ord il publicum: Ord tgei material ein las preits dils reservuars? Dat ei ina statistica che documentescha conta aua che va a perder pervia da lingias defectas? Cont'aua drova la vischnaunca da Ilanz/Glion en in onn? Co stat ei cun tschaffadas privatas dad aua? E savess la midada dil clima effectuar che nus vein in gi memia pauc'aua cheu tier nus? Cun sias rispostas ha Toni Cadalbert cumprovau ch'el ha ina gronda cumpetenza en in sectur elementar dalla veta sin quest planet e che siu mintgagi professiunal ei fetg varionts ed interessants. Ch'el dierma cun il handy sin la meisa da notg, gliez secapescha per el da sesez perquei ch'ei savess dar mintga mument in alarm nunspitgau.

Cheu dat ei informaziuns en connex cun il provediment d'aua: Ilanz/Glion e Trinkwasser.