Il    placat dall'occurrenza

Mesjamna sera, ils 3 da matg 2017 ...

... havein nus saviu festivar in pign giubileum: la 10avla occurrenza „da cuminonza a Ruschein la sera dils 3 dil meins“. Il tema dalla sera: Ina dallas bialas – fotografias. Igl ei semussau che era seras cun ina participaziun pli mudesta san esser per las persunas presentas seras gartegiadas e purtar in grond enrihament, dabia divertiment, plascher ed informaziun.
 
Dallas 16 persunas presentas han 13 purtau ina ni pliras fotografias ch’ein vegnidas projectadas sin ina gronda preit. Las historias tier las fotografias han svegliau regurdientschas dad eveniments privats e publics e procurau per bein enqual surrir e smarvegl. Igl artg dils temas ei staus vasts: ir sin cotgla a pei blut, far musica sin in bastiment sil Lag da Turitg, igl emprem auto da posta a Ruschein la stad 1948, la scargada ed il transport dil purment giu dall’Alp da Schnaus igl atun 1937, far teater el vitg ils onns 50 dil davos tschentaner ni p.ex. ils scolars e las scolaras da Ruschein ch’han fatg cun lur scolasta ils schubregia-calzers igl onn 1987 per rimnar daners per affons en pupira. Ina dallas bialas historias ei stada quella da zacons giuvenots da Ruschein ch’ein ir entuorn igl onn 1972 sin viadi el Tirol ed han vuliu scuvierer leu era intec la veta da notg. Cunquei ch’els vevan buca ina buorsa bein pulpida han els durmiu en lur VW-Käfer. Ed ina sera, en in’ustria, vess ei duvrau pauc ed els fussen stai involvai en ina brava carplina cun dètgas patangadas. Il davos mument hagi in Austriac, gronds sco in cuolm, che steva si per els, saviu seretener da dar fridas ad els. El hagi viu ch’els purtavien T-shirts dil „Bob Club Flims“. Quei Austriac enconuscheva para persunalmein Hans Candrian, il bobist da Flem – ed ord la carplina ei sesviluppada ina fiasta ...