Il dall'occurrenza

Margis sera, ils 3 d’october 2017 ...

... ei la stanza da scola 11 s’emplenida cun da quei da 50 persunas. Igl ei semussau puspei inaga che la catscha grischuna emplenescha buca mo las schelenteras igl atun, ella interessescha era la glieud. Ils quater hosps han raquintau en ina moda viva ed autentica da lur experientschas da catscha. Ed igl auditori ha tedlau cun plascher, cun rir denteren e cun grond interess tgei ch’ei vegniu dumandau e rispundiu. Per exempel quei che pertucca il prezi d’ina buis reschnova per in giuven catschadur ... ni ch’ins sa tremblar sco ina caglia suenter ch’ins ha tuc ina selvaschina ... ch’ins tegn endamen exact il liug, il gi e las uras ch’ins ha sittau zatgei extraordinari ... e ch’il vent, tut secund co el va, sa esser in excellent vischander ni in che lavaga tut da catscha.

Era il luf ei staus in tema, la survigilonza vicendeivla, il cletg ni il discletg da catscha e secapescha las trofeas. Quella sera ha ei buca fatg da basegns da mussar fotografias. La catschadura ed ils treis catschadurs han raquintau da lur eveniments da catscha cun aschi biars maletgs ch’ils presents han survegniu offeriu ina massa diverteivel kino el tgau.
Cun il program „ufficial“ ei la sera denton buca aunc stada alla fin. Sponsurs han procurau per in simpatic star da cuminonza aunc in uriala en la stanza 11. Flurina e Marcus Menzli da Menzli Sport han offeriu in bien vin e Georgina Caderas ed Ursula Beeli ein vegnidas cun paun fatg sez e cun ina deliziusa degustaziun da caschiel dall’Alp da Ruschein.