il     dall'occurrenza ...

... e la prevista en La Quotidiana dils 30 da mars 2022.

Dumengia, ils 3 d'avrel 2022 ...

... suenter dus onns pausa pervia da Corona, ein quasi quater tozzels persunas seradunadas per guder la cuntinaziun dallas seras "da cuminonza". Il tema ha atgnamein giu da far pauc cun gudiment, mo persuenter bia cun il spért da segidar da cuminonza en situaziuns precaras e da prighel. Ils treis hosps dalla sera (sin la foto da dretg a seniester) Gion Casaulta, Rahel Caderas e Duri Coray han possibilitau da dar in sugard en l'organisaziun e la lavur dils pumpiers.

Gion Casaulta (*1980), il cumandant dils pumpiers en la vischnaunca da Ilanz/Glion, habitescha a Castrisch. Leu ha el giu da far pumpiers gia cun 16 onns, quei tenor la lescha dil vitg da gliez temps. En l'ustria, suenter ils exercezis, astgavien ils giuvenots denton buc ir, ha el manegiau cun in surrir. El decuors dils 26 onns vargai ch'el ei ussa tier ils pumpiers, seigi semidau enorm bia ha el raquintau, cunzun quei che pertucca scolaziun, vestgadira e material. El veva priu cun el alla sera "da cuminonza" buca mo calzers e capellina da pumpiers, mobein era giacca e caultschas, tut resti grev che sto tener ora la calira e bia auter che sesviluppescha tier in incendi. Il cumandant ha schau circular quei uorden tras las retschas dil publicum per che mintgin e mintgina sappi mirar e tuccar ed aschia vegnir en contact cun quei material. Igl entir corp da pumpiers dad Ilanz/Glion cumpeglia ca. 110 persunas, 10% da quellas ein dunnas, quei che corrispunda alla media grischuna. Sin basa d'ina seria da fotografias ha Gion Casaulta raquintau dils vasts pensums dils pumpiers. Els vegnan activs buca mo en cass da barschaments, mobein era tier accidents, inundaziuns ni auters prighels digl ambient.

Duri Coray (*1987) che stat a Ruschein ei actualmein aunc meinagruppa. Mo el daventa beinprest officier da pumpiers. El ha demonstrau igl equipament da protecziun da respiraziun (Atemschutzausrüstung): mess sin tgau la capellina cun huba e mascra da salvament e priu si dies la butteglia cun aria cumprimida. Quella montura ei indispensabla sch'ei va per salvar zatgi ord in incendi. Ils pumpiers vegnan numnadamein buca mo confruntai cun fiug e flommas e cun aua da stizzar, mobein era cun fem e gas.

Rahel Caderas (*1992) fa dapi 5 onns survetsch da pumpiers. Avon sis onns eis ella, ch'ei carschida si giu la Bassa, secasada a Ladir el vitg da siu tat, e per ella er'ei clar ch'ella mondi tier ils pumpiers e buc ch'ella paghi la taxa da cumpensaziun (che las persunas denter 21 e 45 onns han da pagar sch'ellas fan buca survetsch activ da pumpiers). Ella fa part dil corp da pumpiers ella "gruppa nord" che cumpeglia Ruschein e Ladir ed ha dad ir a 10 exercezis ad onn. Grazia a quels exercezis seigi ella vegnida cunscienta con impurtont ch'ei seigi da luvrar bein ensemen en ina gruppa.

Il Grischun ha buca unitads da pumpiers da professiun sco ils gronds marcaus da Turitg, Lausanne e s. Gagl per exempel. Ils pumpiers grischuns s'audan tier la categoria dils voluntaris. Per la paga ni per l'indemnisaziun renda ei strusch da far survetsch da pumpiers. Igl ei propi in survetsch cumineivel en favur dalla cuminonza - per spindrar, proteger ni metter en segirtad carstgauns, animals, beins materials ed igl ambient. Cun in liung applaus ha il publicum exprimiu enviers ils pumpiers (era quels e quellas el publicum) respect ed engrazieivladad per lur lavur e lur engaschi. Dus puncts ha il cumandant da pumpiers Gion Casaulta per finir mess a cor a tut las persunas presentas. Primo: Dar alarm aschi spert sco mo pusseivel e buca targlinar. Secundo: Telefonar al 118 e buca forsa ad x-in collega che fa pumpiers. 

Per zacons muments impressiunonts ha in cuort video da siat minutas procurau, in video en connex cun il grond barschament da 1939 a Ruschein. Suenter il "program ufficial" ha ei dau in apéro. Cun in migiel aua ni vin enta maun han biars gudiu da star aunc in'uriala da cumpignia e dar ina paterada cun quel e tschel.