Il    dall'occurrenza ...

... e la prevista en La Quotidiana dils 1 da mars 2023.

Vendergis, ils 3 da mars 2023 ...

... ein bunamein 50 persunas seradunadas per tedlar tgei ch'il president communal Marcus Beer raquenti - ed era per svidar il puppen ed exprimer igl agen malesser enviers fatgs e situaziuns en la vischnaunca da Ilanz/Glion.

En siu beinvegni ha Andreas Joos purtau in citat da Bill Clinton che hagi manegiau: "Esser president ei sco dad esser administratur d'in santeri: Ins ha massa glieud sut ins - mo negin che teidla." Andreas Joos ha era raquintau da sias retschercas tier Google per eruir cons Beers ch'ei detti insumma sin igl entir mund. Il resultat: "Beer e Beer - sco Sand am Meer". En Tiara tudestga detti ei varga 22'000 ed en Svizra (ch'ei sil 7avel rang puncto Beers) detti ei bunamein 3'000.

Sin la damonda tgeininas treis qualitads ni habilitads che seigien necessarias ed indispensablas per esser in bien president communal, ha Marcus Beer enumerau: 1. saver communicar, 2. saver metter prioritads ed 3. haver pazienzia. Ch'el tgira ed appreziescha la communicaziun ha el era mussau alla sera "da cuminonza". El ei staus in dils davos ch'ha bandunau la stanza 11 dalla casa da scola suenter igl apero. E duront sia presentaziun ha el raquintau ch'el gaudi da vegnir plidentaus sin via tut spontan era da persunas ch'el gnanc enconuschi, che veglien discuorer cun el. En connex cun las prioritads ha el menziunau ch'el patratgi magari vid il "principi Eisenhower" dil president american, in sistem che metta ils differents pensums en categorias da "impurtont" ed "urgent" e che fa attent ch'igl urgent ei buca adina impurtonts ed igl impurtont buc adina urgents. Marcus Beer ha presentau siu proceder en treis categorias: emprema prioritad ha quei che sto vegnir tractau ussa, secunda prioritad ha quei ch'ei impurtont, mo sa e sto spitgar aunc intec. E lu detti ei aunc ina tiarza categoria. Quella che sesligi magari da sesez ni mondi directamein el canaster da pupi. El ha buc cuschentau ch'ei seigi enorm bia cun il qual in president communal vegni confruntaus mintga gi, fatgs impurtonts e bagatellas, ed en ils pli biars cass sappi el secapescha buca decider persuls. Pazienzia drovi ei cunzun perquei che biaras fatschentas vegnien retardadas pervia da recuors da differentas varts e stoppien aschia vegnir repassadas e revididas, quei che drovi temps e magari era dapli daners.

La discussiun publica cul president ei stada animada e liunga. Pliras persunas han priu il plaid en connex cun la "ordinaziun da traffic" sin vias da megliuraziun e dad alp che vul unificar ina "salata da tablas da scamond" (citat ord La Quotidiana 28.2.2023). Igl ei vegniu mess a cor al president che l'administraziun communala a Glion dueigi schar reger la sauna raschun e buca metter sil tgau uordens che seigien secumprovai ils davos onns en las differentas fracziuns. Ed igl ei vegniu fatg attent ch'ins dueigi duvrar en quella ordinaziun da traffic ils nums locals enconuschents dils territoris e buca inventar nums che negin sappi tgei loghens che seigien manegiai. Da discuorer ha era dau il bus da sport naven da Ladir/Ruschein en l'Arena Alva. La vischnaunca stuessi s'engaschar cheu pli fetg per defender "vegls dretgs" e mantener ina buna purschida. Criticada ei era vegnida la "nuntransparenza" cun ils daners dallas taxas da turissem. Puncto "reclama turistica" vegnien las treis fracziuns da Siat, Ruschein e Ladir tractadas da madregna e savens schizun ignoradas diltut. Ina persuna ha dumandau schebein il president communal savessi intervegnir en connex cun il "niev areal dalla staziun" sinaquei ch'ei detti in tetg sur ils autos da posta che partan naven da Glion. In'autra persuna ha reclamau ch'ei hagi dau memia bia disvaris en connex cun damondas da baghegiar ed ha menziunau che quei seigi "Amtsmissbrauch" sch'igl uffeci da baghegiar tarmetti pervia da piculezzas tut las damondas a Cuera (enstagl da decider sez) e procuri aschia per retards e per malsegirezias. Bia da discuorer ha era dau il sistem da scola enteifer la vischnaunca. Ei fussi donn e puccau sche la scoletta e la scola svanessien da Ruschein che hagi ina excellenta infrastructura cun sias localitads da scola. Centralisar dapli giu en la val e pretender che mo ils affons dils vitgs stoppien far il viadi (engiu ed ensi) - quei astgi buca esser la sligiaziun. Ei fussi p.ex. da ponderar sche buca era affons che habiteschan a Glion savessien far il viadi (ensi ed engiu) e profitassien aschia enormamein dad ina buna instrucziun romontscha.

Marcus Beer ha fatg neginas empermischuns a la sera "da cuminonza". Mo el ha fatg massa notizias e sincerau ch'el vegli intervegnir els differents departements per che ils giavischs e cussegls da quels e quellas da Ruschein vegnien discussiunai e tractai. Zatgei ha el punctuau, cunzun en connex cun las scolas: Bunas decisiuns dependien da massa differents facturs. E sche la vischnaunca anfli buc - suenter plirs inserats - scolasts ni scolastas per la scola da Ruschein, sche seigi ei tut auter che sempel da cattar bunas sligiaziuns che cuntentien tuts.

Suenter quellas discussiuns vivas ed engaschadas ch'han schau sentir il puls dalla populaziun ei la sera ida a fin en in'atmosfera amicabla e plascheivla - cun in migiel vin ni aua.

                                                                                                                         Maria Cadruvi