Dumengia, ils 3 da mars 2019 …
... ein biebein 50 persunas stadas en la stanza da scola 11. Il tema “60 onns club da skis Ruschein” ha procurau per bein enqual risada cordiala, cunzun en connex cun il sguard anavos. Andreas Joos veva preparau in cuort film da strusch treis minutas (“da tgaus e tgaubrochels”) ch’el veva tagliau ord duas uras material da film d’avon varga 40 onns. Marcus Menzli era vegnius cul vegl cudisch dils protocols, nua che anteriurs actuars dil club vevan nudau cun lur bialas scartiras quei ch’era mintgamai curriu e passau. Ed el, ch’ei staus en duas epocas president dil club, ha menziunau cun plascher tut las arbagias che sportists da Ruschein han recaltgau el decuors dils onns. Gieri Arpagaus, il president actual e dapi prest 25 onns (!) ha survegniu in grond applaus per sia enorma lavur en favur dil club. El ha manegiau ch’il spért cumpetitiv stetti oz meins el center da lur activitads. In dils puncts culminonts en lur program annual seigi senza dubi la cuorsa dil club cun la sera da rangaziun e divertiment. Mo exact uonn ha el buca saviu participar a quei eveniment ils 23 da fevrer 2019. El era malsauns ed ha stuiu pertgirar il letg. Bianca Bleuler, il tierz hosp envidau, ha stuiu desister da vegnir a “da cuminonza – la sera dils treis”, perquei ch’ella era malsauna. Spontan ed a cuorta vesta ei Annette Cola stada promta da seser davon e raquintar. Ella ei vegnida ludada fetg da commembers dil club per siu grond engaschi il gi e la sera dalla cuorsa. Ella ei mumma da dus affons che van regularmein als gis da “giuventetgna e sport” (G+S), ina dallas purschidas principalas dil club. El decuors dalla sera eis ei semussau che quella offerta per ils affons da scola ei in grondius chit per la cuminonza dil vitg insumma. G+S colligia las generaziuns perquei che buca mo ils affons, mobein era ils geniturs ed ils e las menadras ein cumpigliai. Ed ils affons emprendan buca mo da far sport, mobein era per la veta, duront quels gis. Els emprendan dad agir en ina gruppa, da prender risguard, da daventar pli independents mo era da s’integrar. Ton Marcus, sco Gieri ed era Annette han mess a cor quella sera a tut ils geniturs da dar a lur affons la schanza d’astgar participar a quella purschida.
Il club da skis ei buca la suletta uniun da Ruschein che festivescha uonn in giubileum rodund. All’entschatta dalla sera ein perquei cuortamein era las autras treis uniuns giubilaras vegnidas presentadas: Placi Giusep Cadruvi ei president dalla Societad da tir Vorab ch’ei dat dapi 100 onns, Fina Blumenthal ei presidenta dall’Uniun da dunnas ch’ei vegnida fundada avon 80 onns ed Ursulina Cadruvi ei actuara dil Chor mischedau ch’exista dapi 40 onns.
Grazia ad in sitg, offerius da Menzli Sport, ha la sera “da cuminonza” survegniu (suenter il program ufficial da ca. 75 minutas) ina biala cuntinuaziun cun printgas e vivas e cun dar cun quel e tschella ina paterlada e discuorer da temps presents e vargai.