Il    dall'occurrenza ...

 

... e la prevista en La Quotidiana dils 22 dad uost 2019

Margis, ils 3 da settember 2019 …

… ein varga 50 persunas vegnidas alla sera "da cuminonza" per tedlar tgei che Filip Cola raquenta da sia lavur e da sia amur. Igl um da 36 onns, ch'ha entschiet sia via professiunala en la hotellaria dil turissem grischun, meina oz la partiziun da hotellaria en ina casa da vegls e da tgira el cantun Turgovia. Ei hagi dau in eveniment-clav che hagi intimau el da far il pass naven dil hotel en la casa da vegls. En in niebel hotel hagi ina buobetta getg "Guten Tag" ad el. Ed el hagi lu udiu co la mumma da quella buobetta hagi getg a sia feglia "Ich hab dir doch gesagt: Das Personal musst du nicht grüssen!" La renconuschientscha e l'engrazieivladad dalla clientella seigi en ina casa da tgira tut in'autra che en in hotel, e quei detti senn e cuntentientscha, ha el manegiau. Mo Filip ha era concediu che l'atmosfera glamurusa e splendurusa dil hotel maunchi mintgaton ad el. Sper sia lavur fa el pil mument ina scolaziun supplementara en gerontologia, la scienzia dil vegnir vegls dil carstgaun. El seigi mai staus in scolar fetg ambizius puncto notas, mo el seigi in carstgaun cun marveglias. En quella scolaziun mondi ei cunzun era per psicologia e quei interesseschi el fetg. Ina da sias motivaziuns per sescolar vinavon seigi da menar sez zacu ina casa da vegls e da tgira.

Era l'amur ei buca vegnida alla cuorta la sera "da cuminonza". Filip ha raquintau da siu temps dalla pubertad cura ch'ils hormons hagien entschiet a saltar ed hagien procurau per empau irritaziun era tier el. L'emprema persuna, alla quala el hagi saviu confidar ch'el seigi homosexuals, seigi stada ina cameratta da scola. E suenter hagi el giu la curascha da palesar quei era en famiglia, malgrad ch'el vevi ina certa tema da buca vegnir acceptaus. Mo el hagi giu grond sustegn e capientscha en famiglia e quei seigi tenor el il pli impurtont per astgar esser sesez en la veta. Naturalmein ch'el seigi era vegnius confruntaus el mintgagi cun pregiudezis e remarcas senza respect. Mo oz stetti el sur quei e laschi ir quei dad ina ureglia en e dall'autra ora. Sin la damonda pertgei ch’el discuori aschi aviartamein da sia homosexualitad ha el manegiau ch’el stoppi nuota menziunar quei adina e dapertut. Mo en muments e situaziuns decisivas, sco p.ex. al plaz da lavur, seigi ei impurtont per el dad informar la glieud. Quei eviteschi malsegirtads e detti ad el in sentiment da levezia e segirtad. El militar hagi el sez dil reminent mai sentiu ina tenuta negativa enviers homosexuals. Il cuntrari. Cura ch'in exponent dad in'autra cumpignia seigi s'exprimius a moda nunadequata sur da homosexuals seigien siu superiur ed in'entira roscha camerats stai davos el ed hagien dau sustegn. 

Filip ha informau e raquintau duront ina bun'ura en sia moda spontana, cordiala, directa e diverteivla. Malgrad ch'igl ei iu quella sera per tabus, remarcas discriminontas e pregiudezis ha ei era dau da rir e surstar beinenqual gadas. Per exempel cura ch'el ha raquintau dalla gronda fiasta da nozzas che el e siu um hagien fatg il december vargau. Ina fiasta cun in liung aperitiv per varga 250 persunas e cun ina tscheina festiva e glamurusa per varga 100 persunas. Ed el hagi plascher che siu partenari da veta hagi priu cun la maridaglia il num "Cola". El sez vessi giu meins gust dil num da siu car - Blaser. Perfin siu bab hagi giu tschaffen da quei. Colas detti ei la finala bia pli paucs che Blasers.