Il dall'occurrenza

Dumengia sera, ils 3 da settember 2017 ...

... ein varga 30 persunas seradunadas en la stanza da scola 11 per tedlar e mirar tgei che Ivan Coray e Romana Lanicca-Casanova raquentan da lur occupaziuns dil temps liber ch’ein dapli ch’in hobi.

Sin las 10 fotografias che Ivan ha mussau han ins viu il tip dad aviuns privats ch’el pilotescha: pintgas maschinas per duas tochen quater persunas. Il giuven da 30 onns ch’ei carschius si a Ruschein, da professiun electro-inschignier, ha menziunau las differentas cumponentas che giogan ina rolla cun sgular: la tecnica, la meteorologia, la topografia, mo era la concentraziun, l’orientaziun ed il senn da responsabladad. El seigi plitost in pilot precaut e getgi pli bugen ina gada dapli „na, oz sgol’jeu buc cun da quellas cundiziuns“ che da riscar damemia. La fatscha dad Ivan ha tarlischau pliras gadas la sera: p.ex. cura ch’el ha raquintau da siu emprem sgol sco passaschier ch’el veva 10 onns e veva selegrau enormamein sin quei eveniment, cura ch’el ha schau sentir siu plascher dad oz sez saver decider tgei ruta prender en l’aria e cura ch’el ha menziunau tgei enorma fascinaziun che quei ei dad observar il mund da surengiu – e mirar cunzun era sin cuntradas ch’ins enconuscha bein.

La secunda part dalla sera ha entschiet cun ina demonstraziun dil carate da Goju-Kai. Romana e siu um Domenic han presentau zacons schatgs da lur art da cumbat. Quella vigur, lura la coordinaziun dalla respiraziun e dil „dar e prender“, mo era la levezia e precisiun dils moviments – tut quei ha impressiunau e commuentau las persunas presentas. E zacontas dallas numerusas medaglias che Romana veva priu cun ella han fatg surstar el senn da „nus gnanc savevan buc che nus hagien denter nus da quels campiuns mundials“, medaglias gudignadas en lutgas internaziunalas buca mo en Svizra, mobein era p.ex. en l’Australia ed en l’Africa dil Sid. Las strentgas hirarchias ed ils rituals el mund dil carate ein naturalmein era stai in tema la sera „da cuminonza“. E per finir ha la dunna da 36 onns che stat a Ruschein ed instruescha denter auter alla Scola professiunala da Glion tradiu tgei ch’il carate ha „dau“ ad ella per la veta: segirtad, sesentir da casa egl agen tgierp ed ina gronda movibladad.