Il    dall'occurrenza ...

... e la prevista en La Quotidiana dils 28 da mars 2018.

Margis sera, ils 3 d'avrel 2018 ...

... ein da quei da 45 persunas vegnidas per emprender d’enconuscher la presidenta dalla vischnaunca da Ilanz/Glion Carmelia Maissen, pia era „nossa presidenta“. Alla fin dalla sera – sin la damonda: nua giavischa ella che la vischnaunca da Ilanz/Glion seigi en 10-12 onns – ha ella manegiau ch’ei fuss bi sch’ei reussess da sviluppar ina identitad cumineivla per quella vischnaunca fusiunada. Aunc ussa seigi mintga vischinadi plitost interessaus e focussaus sin igl agen e buca sin la vischnaunca entira.

Carmelia Maissen, naschida 1977, dispona dad in vast sacados da scolaziun e formaziun. En sia dissertaziun („Hochhaus und Traktor“) eis ella sededicada al svilup da construcziun e habitadis el Grischun dils onns da 1960 e 1970. Pli tard ha ella luvrau sco sviluppadra regiunala dalla Regio Viamala, ina occupaziun ch’ella taxescha sco „lavur da spindrera“. Per la politica ha ella giu interess gia da giuvna gimnasiasta. Denter auter ha ella era raquintau da „siu onn a Berna“ ch’ella ha saviu far grazia alla „Stiftung für Wissenschaftliche Politikstipendien“, in onn ch’ha possibilitau ad ella da mirar davos las culissas dil parlament federal, in onn ch’ha levgiau ad ella zacons onns pli tard da tgamunar duront quater onns, cun cumpetenza ed era cun stil e cultura, il nievelegiu parlament dalla vischnaunca fusiunada da Ilanz/Glion. Ussa ha ella midau vart, dalla legislativa en la executiva ed ha giu da surprender, sco quei ei usus en la politica, differents „fatgs“ che auters han gia giu mess sin rucca. Ella ha entschiet siu emprem onn presidial senza in preventiv approbaus dil parlament, ella sa che las finanzas dalla vischnaunca ein buca cavigliadas sin rosas, ella ei pertscharta che temas sco la scola ni la reducziun da terren da baghegiar vegnan a dar da discuorer aunc bein savens egl avegnir ed ella ei cunscienta ch’igl ei da sestentar per mantener plazs da lavur en la regiun.
Sin la sempla damonda pertgei ch’ella fetschi atgnamein politica ha ella manegiau ch’ella vegli contribuir zatgei sinaquei che nossa societad sappi viver bein ed en pasch – quei che secapeschi oz tuttavia buca da sesez.