Il   dall'occurrenza!

Venderdis sera, ils 3 da mars 2017 ...

... havein nus mess „da cuminonza“ sut il motto „Cantar fa bein! – Singen tut gut!“ e nus havein fatg ina sera bilingua ch’ha carmalau neutier exact 25 persunas. La dirigenta Ursula Capaul haveva tscharniu varga in tozzel canzuns romontschas e tudestgas ed ella haveva era procurau cun Fina Blumenthal (clavazin), Marietta Cadruvi (ghitarra) e Patricia Cadruvi (accordeon) per accumpignament instrumental.

L’emprema part dalla sera havein nus dedicau al di d’oraziun mundiala che vegn commemoraus en varga 170 tiaras mintgamai igl emprem venderdis da mars. Mintg’onn preparan dunnas dad in’autra tiara ina documentaziun leutier. Uonn ei quei stau dunnas dallas Filippinas. E sco hosp special dalla sera havein nus astgau beneventar Sona Heystermann ch’ei naschida 1971 sin las Filippinas e che stat dapi 2014 a Ruschein.

Cun sias informaziuns cordialas e spontanas ha ella purtau in legreivel accent en nossa cuminonza ed alla fin ha ella schau udir nus il Bab nos (Ama namin) en Tagalog, in lungatg dallas Filippinas. Per il di d’oraziun mundiala vegn fatg ina collecta per projects da dunnas en differentas tiaras da svilup. La collecta a Ruschein ha purtau ensemen la biala summa da 150 francs!